Gæti ég fengið texta, takk?

Í upphafi mánaðarins var enn og aftur lagt fram frumvarp til laga um textun í sjónvarpi. Síðast "sofnaði það í nefnd" og er nú komið aftur í menntamálanefnd. Ég vona að Siggi Kári og félagar geri meira í málinu nú en síðast. Löngu síðan orðið tímabært, löngu síðan. Og ég meina löngu síðan.

Í gær horfði ég á fréttir. Það er ekki fréttnæmt. En eitt verð ég að benda á, enn einu sinni. Í fréttatímanum var frétt um heyrnarlausa. Fréttin var textuð svo heyrnarlausir gætu áttað sig á um hvað fréttin væri. HALLÓ?!?! Heldur fólk virkilega að heyrnarlausir sitji bara fyrir framan sjónvarpið, horfi á fréttirnar án texta og BÍÐI eftir því að það komi frétt um þá sem er textuð? Hvað eru það.. 3 fréttir á ári eða? Er þessi texti ekki til á textavélum sem fréttamennirnir lesa af? Ohh.. ég verð svo hneyksluð.

Ég verð að láta fylgja með töflu um textun í ríkissjónvarpi nokkurra Evrópulanda. Taflan er úr frumvarpinu og tölurnar eru frá árinu 2003 og hafa (vonandi) eitthvað hækkað, en ég bít ekki af mér rassinn hafi svo ekki farið.

Land:	Textun á mánuði (ríkisstöðvar):
Albanía	Enginn, aðeins textun fyrir erlent mál
Austurríki	170 tímar
Belgía	5 tímar
Danmörk	189 tímar
England	80% af öllu efni á BBC, ITV og C4 20% í stafrænum útsendingum
Finnland	15% af öllu innlendu efni
Grikkland	14 tímar
Írland	23 tímar
Ísland	1 tími
Ítalía	80 tímar
Pólland	30 tímar
Spánn	446 tímar
Sviss	240 tímar
Þýskaland	387 tímar

EINN KLUKKUTÍMI Á MÁNUÐI???  

Hvaða ár er eiginlega? 

Díses kræst.is 

Athugasemdir

[Marý Björk (IP-tala skráð) 14.2.2007 kl. 17:28]

Ég bjó í Bretlandi um tíma og ég átti ekki til orð þegar ég flutti þangað þegar ég fattaði að meira og minna allt sjónvarpsefni væri textað á 888. Kom sér einstaklega vel þegar fólkl í einhverjum þættinum var að tala með gjörsamlega óskiljanlegum enskum hreim. Meira að segja beinar útsendingar eru textaðar hvort sem það er verðlaunafhendingar, fótbolti eða snóker. Að ógleymdu júrovision þar sem öll lögin eru textuð með ensku útgáfunni af laginu (hvort sem þau eru sungin á ensku eða ekki). 

Auðvitað ætti þetta að vera löngu komið í íslenskt sjónvarp. Ég get ekki ímyndað mér að það sé erfitt að texta t.d. fréttirnar á 888. Vil einnig benda á þessa slóð þar sem er einmitt rætt um kostnað og vinnu við að þýða fréttatímann: http://malbein.net/?p=1212  

[Fanney Dóra Sigurjónsdóttir, 14.2.2007 kl. 17:38]

Takk fyrir þetta Marý Björk!

Já, textun hérlendis er svo á eftir. Einnig íslenskar bíómyndir í bíóum.. ömurlegt að það sé ekki skylda að hafa amk nokkrar sýningar með texta svo ALLIR landsmenn geti notið þess að fara í bíó. 

[Kolla, 14.2.2007 kl. 22:09]

Ég er 100% sammála þér. Meiri texta takk!!!

[Einar Logi (IP-tala skráð) 15.2.2007 kl. 22:19]

Vá hvað maður getur gleymt sér í eigin hagsmunum. Ekki var ég búinn að hugsa neitt sérstaklega úti í þetta, nema á þann hátt að ég var að leita að dönsku sjónvarpsefni með texta, til að læra af því. Ég vil mikið frekar að skattpeningarnir mínir fari í þetta en í Eurovision-eyðslusvallið. Meiri textun í íslenskur sjónvarpi á svo sannarlega rétt á sér.