Lánalán

Í dag er hægt að verða sér úti um allskonar lán. Yfirdráttalán eru bara gömul lumma. Sama má segja um verðtryggðu og óverðtryggðu lánin. Núna er móðins að taka myntkörfulán ,,því það er svo hagstætt". Þá eru einnig til námslán og námslokalán fyrir fólk eins og mig og bílalán fyrir fólk eins og Þóru. Framkvæmdarlán eru hipp og kúl en ferðalánin eru ekki alveg að ná sér á strik eins og ferðatölvulánin. Sumir taka sumarhúsalán, sem er vel, en aðrir kjósa sér fasteignalán og bíða með sumarhúsið. Einhverjir taka sér svo hesthúsalán já og listaverkalán. Svo eru líka til greiðsluerfiðleikalán sem og skuldbreytingarlán. 

Ég fæ þó nýmóðinslán á morgun. Þá tek ég makalán, en Valla vinkona lánaði mér Adda svo flutningarnir gangi hraðar. Ekki slæmt það! Ekki nóg með að ég fái aukapar handleggja í flutningana heldur fylgir líka sendiferðabíll með! Þetta kalla ég góða þjónustu. 

Ekkert svín slasaðist við gerð þessarar færslu. 

Athugasemdir

[Ólafur fannberg, 18.5.2007 kl. 22:33]

makalán á hvaða prósentum?

[Fanney Dóra Sigurjónsdóttir, 18.5.2007 kl. 23:19]

úbbs.. gleymdi að spyrja að því...